DAVAO CITY – Nalakip ang usa ka Dabawenyo nga opisyal sab sa military sa mga namatay atol sa pagkahagsa sa usa ka C-130 sa Patikul, Sulu niadtong Dominggo.

Siya si 1^st Lieutenant Karl Joseph Hintay, 26 anyos, taga Panabo City, Davao del Norte, ug kabahin sab kini sa Salaknib Class of 2017 sa Philippine Military Academy isip usa ka piloto.

Usa sab siya ka kanhi estudyante sa Maryknoll High School sa Panabo, ug kanhi Biology Student sa University of the Philippines – Mindanao.

Pinaagi sa Facebook post, nagpadayag og pahasubo ang Maryknoll High School kalabot sa kalit nga kamatayon sa ilang alumnus nga si Hintay.

Daghang Dabawenyo usab ang nagpahatod og pahasubo ngadto sa pamilya ni Hintay tungod sa maong panghitabo.

Usa lang si Hintay sa 50 nga namatay sa C-130 plane crash.

Laing 46 pa ka mga kauban niya sa serbisyo ug tulo ka mga sibilyan ang nakabsan usab sa ilang kinabuhi sa nahisgutang insidente.