DAVAO CITY – Mihatag ug katin-awan ang Bureau of Internal Revenue (BIR) Davao nga padayon ang ilang paghatag ug serbisyo sa publiko bisan pa man nga aduna pipila ka bahin sa ilang buhatan ang temporaryo nga gisuspende gumikan sa kaso sa Covid-19.
Kahinumduman nga una ng nagpagula ug kamandoan ang BIR nga ang ilang Receiving and processing sa Certificate of Registration (COR) alang sa New Business Registrants (NBR) nga mao ang Counter 6 ug Authority to Print (ATP) nga mao Counter 9 ang temporaryo nga gisuspende tungod sa gipatuman nga preventive measures aron nga mapugngan ang pagkatag sa kagaw sulod sa ilang buhatan.
Una ng gitambagan sa buhatan ang ilang mga kliyente nga ihulog lamang sa mga box nga anaa sa gawas sa buhatan ang mga documentary requirements alang sa mga nag-apply ug NBR ingon man ATP.
Angayan sumala pa nga dili kalimtan ang pagbutang ug contact number sa application form aron nga dali na lamang kini nga ma-contact sa higayon nga kinahanglan na nga mosibog sa kliyente paingon sa mosunod nga step.
Nangayo karon ug despensa ug pagsabot ang buhatan ngadto sa publiko.
