DAVAO CITY – Nagbahad si Davao City Mayor Inday Sara Duterte Carpio sa mga BPO company sa siyudad nga wala mitamud sa sakto nga pamaagi ilabi na sa mga empleyado sa natakdan sa covid-19 ingon man sa dili sakto nga pagpatuman sa Health protocols.
Tipik lamang ang pahayag sa Mayor kalabot sa naunang pahayag usab ni Marjorie Culas, Asst. Health Officer sa City Health Office nga adunay usa ka BPO company nga nakatala ug 403 ka mga call center agents nga nagpositibo sa covid-19 human ang gipahigayon nga surveillance testing sa ilang kapin 1,000 ka mga empleyado.
Sumala sa Mayor nga kung adunay makitang pagsupak sa usa ka kompanya partikular na ang wala paghimo ug lakang sa ilang mga empleyado nga natakdan sa kagaw, mamahimong pasakahan kini ug reklamo.
Sa kasamtangan pabilin sumala pa nga naka-lockdown ang wala hinganli nga BPO company kinsa temporaryo sab nga gihunong ang operasyon niini.
