DAVAO CITY – Dungan sa kasaulogan sa Dengue Awareness month, gipahugtan pa karon sa lokal nga kagamhanan partikular na sa City Health Office (CHO) ang pagpahigayon ug mga lakang aron masiguro nga mapugngan ang pagsaka sa kaso sa dengue dinhi sa siyudad.
Kahinumduman nga anaa sa unom ka mga dengue hotspot areas ang gimonitor karon sa ahensiya human nga nakatala kini ug taas nga kaso sa dengue.
Gikanayon sa ahensiya nga sa unang lima ka bulan karong tuig 2021, mikabat sa 505 ka mga dengue cases ang ilang natala hinungdan nga doble ang ilang pagpaningkamut nga mapasabut sa publiko ilabi na sa mga lugar nga taas ang kaso sa dengue ang kamahinungdanon sa pagpanglimpiyo sa palibut ilabi na sa mga area nga sagad mangitlog ang mga lamok.
Subli sab nga nanawagan ang CHO nga batasanon ang 4 o’clock habit diin gawas sa paglimpiyo sa palibut, angayan sab nga bungkagon ang mga breeding site sa mga lamok sama na lamang sa mga gipasagdan nga container nga adunay sulod nga tubig, gipasagdan nga mga ligid o botelya ug daghanan pa.
Kung adunay dagko nga drum nga gipundohan angayan sumala pa nga takluban kini aron dili makahigayon ang mga lamok nga makapangitlog.
Una ng nasayran sa CHO nga anaa sa lima ka mga indibidwal ang natalang namatay sa dengue karong 2021.
Una ng nasayran kang Beth Banzon sa CHO-Davao, nga pipila sa mga dengue hotspot sa siyudad ang gilangkuban sa Talomo Poblacion, Barangay Duterte, Paciano Bangoy, Maa, Buhangin ug Tibungco.
