DAVAO CITY – Padayon karon ang gipahigayon nga contact tracing sa mga ulahing nakahimamat sa mga pulis nga nagpositibo sa Covid-19.
Kahinumduman nga nagpatuman karon ug lockdown ang Police Regional Office (PRO)-11 human nga ubay-ubay sa ilang mga personahe ang nagpositibo sa Covid-19.
Sumala pa kang Police Major Eudisan Gultiano, tigpamaba sa PRO-11 nga nagpatuman sila karon ug pito ka adlaw nga lockdown kini human nga halos matag adlaw sab sila nga makatala ug nagpositibo sa ilang han-ay.
Sa kasamtangan, gipahimutang sumala pa ang mga nagpositibo nga pulis sa ilang kaugalingon nga isolation facility sa Malagos ning dakbayan.
Dili sumala pa kalikayan nga matakdan ang kapulisan gumikan sa ilang trabaho ilabi na ang pagpatuman ug checkpoint sa mga barangay nga taas ang kaso sa Covid-19.
Mas gipahugtan na sab karon ang kapulisan sa pagpatuman ug health protocols sulod mismo sa ilang tagsa-tagsa nga buhatan aron nga malikayan ang pagsaka sa kaso sa mga natakdan sa ilang han-ay.
