DAVAO CITY – Gipasalig ni Dr. Jordana P. Ramiterre, head sa Reproductive Health and Wellness Center (RHWC) nga padayon nila nga serbisyohan ang mga pasyente nga nagpositibo sa human immunodeficiency virus/acquired immunodeficiency syndrome (HIV/Aids) ilabi na karon nga aduna nay “confirmatory hubs” alang sa blood specimens.
Sumala pa kang Ramiterre, nga gisugdan na karon ang pag-operate sa Southern Philippines Medical Center isip confirmatory laboratory alang sa HIV/Aids specimens.
Hinuon ang mga blood specimens ang ipadala sa Manila partikular na sa San Lazaro Hospital aron nga ipailalom usab sa confirmatory tests.
Gitino sab ni Ramiterre nga kadtong buot nga mopailalom ug HIV testing kinahanglan una nga ma-screen ayha ang aktwal nga pagpahigayon ug testing.
Sa higayon nga “reactive,” ang gikuha nga sample, ipailalom kini sa confirmatory test.
Gumikan kay aduna nay kaugalingon nga HIV confirmatory laboratories, ang test results mamahimo ng ipagawas sulod lamang sa mubo nga panahon.
