DAVAO CITY – Gikabutyag nga nakabsan sa kinabuhi ang kanhi empleyado ni Former Mati City Mayor Carlo Rabat sa Davao Orriental.
Giila ang biktima sa pagpamusil nga si Arnold Baulos, 57-anyos ug residente sa nahisgutang lugar.
Gipusil ang biktima sa dughan nga bahin sa mga suspetsado nga nagsakay ug motorsiklo atubangan sa pinuy-anan niini sa Brgy. Dahican, nga misangpot sa hinanaling kamatayon niini.
Nahitabo ang pagpamusil kagahapon alas-6:30 sa kabuntagon, samtang na-recover sa mga imbestigador sa Mati City PNP ang usa ka basiyo sa bala nga matod pa gikan sa 9mm pistol.
Sa kasamtangan, wala pa masayri ang nahimong motibo sa krimin gumikan kay nagpadayon pa ang gihimong imbestigasyon sa kapulisan aron masayran ang anggulo sa nahisgutang krimin.
