DAVAO CITY – Gipasalig sa ahensiya sa Department of Public Works and Highways (DPWH)-11 nga gilayon nila nga aksiyon ang nagguba nga dalan nga nagkonekta sa Barangay Mandug ug Brgy. Callawa diin nakankan ang yuta niini ug nadaut ang kalsada.
Sumala pa kang Dean Ortiz, tigpamaba sa DPWH-11, nga kasamtangan mipahigayon na ug survey ang ilang buhatan sa lugar aron nga masubay sa mga engineers kung unsa ang tukma nga istraktura ang ipatuman sa lugar ilabi nga gikonsidera ang nahisgutan nga dapit isip landslide prone areas ug dili na subli pa nga mahitabo ang susama nga insidente.
Laoman sumala pa nga sa mosunod nga mga semana masugdan gilayon ang pag-repair sa dalan aron nga dili mabutang sa peligro ang mga mo-agi sa lugar ilabi na ang mga dagkong sakyanan.
Gipahimangnoan na lamang ang mga motorista nga maghinay ilabi na panahon nga mobundak ang ulan nga malikayan ang disgrasya.
