DAVAO CITY – Sugdan na sa mosunod nga tuig ang pagtukod og medium-rise residential projects diin ipahimutang ang mga walay panimalay nga mga pamilya dinhi sa siyudad.
Sumala pa kang Ivan Cortez, head sa Davao City Planning and Development Office (CPDO), gihan-ay na ang nahisgutan nga plano sa panggamhanang lokal ingon man National Housing Authority (NHA) alang sa nahisgutan nga proyekto.
Gi-awhag sab niini ang mga pamilya nga walay pinuy-anan ilabi na kadtong naga-arkila lamang og panimalay nga makiglambigit sa financing programs sa panggamhanan.
Gawas sa paghatag og pinuy-anan sa mga homeless families, gipasabot ni Cortez nga gipili sa lokal nga panggamhanan ang medium-rise residential buildings nga usa ka “horizontal” development diin langkuban kini sa single-detached housing units nga magamit pa ang nahibilin nga areas alang sa dugang pagpalambo sa siyudad.
Target sa siyudad ang mga dapit nga delikado sa mga pagbaha, landslide, liquefaction, linog, storm surge ug daghanan pa.
Gikanayong anaa sa 46,000 ngadto na sa 48,000 hectares gikan sa 244,000-hectare total land area sa siyudad ang mamahimong gamiton alang sa pagpalambo.
Hinuon dili hilabtan sa maong plano ang mga critical watershed areas, biodiversity areas, conservation areas, ug agricultural areas.
