DAVAO CITY – Gi-aprubahan sa City Council kagahapong adlawa sa Second Reading ang sugyot nga ordinansa nga mag-regulate sa paggamit og bag-ong Food and Medicine Pass o gitawag karon nga “FM Pass Ordinance” sa dakbayan.
Dungan sa pagpalabang sa ordinansa ang paghatag og otoridad kang Davao City Mayor Sara Duterte-Carpio nga lagdaan ang kasabutan tali sa Department of Health Davao Center for Health Development alang sa pagbalhin sa pondo ngadto sa City Government alang sa pagbayad og hazard pay ug special risk allowance sa mga health workers sa siyudad.
Laing ordinansa sab ang napalabang nga maghatag og otoridad sa City Mayor nga lagdaan ang MOA tali sa Southern Philippines Medical Center alang sa operasyon sa Davao International Airport Laboratory.
Kalakip sab niini ang paghatag og otoridad kang City Mayor Sara Duterte-Carpio ang paglagda sa MOA tali sa nagkadaiyang institusyon aron nga gamiton nga quarantine og isolation facilities ang pipila ka mga tulonghaan sa siyudad nga gilangkuban sa Sta. Ana Central Elementary School, Sta. Ana National High School, Magallanes Elementary School, Bolton Elementary School ug Hotel Midori Davao.
Naaprubahan sab kagahapon sa City Council ang paghatag og pagtugot sa City Mayor nga lagdaan ang Deed of Donation tali sa Aboitiz Foundation, Inc., alang sa idonar nga RNA (Magna Pure 96 Instrument) ug ang Certificate of Existence of Project nga adunay kalabutan sa programa nga adunay titulo nga COVID-19 Response Aboitiz Group Relief Operations.
