DAVAO CITY – Gianunsyo sa Commission on Election (Comelec) XI-Davao nga aduna nay bayad ang pagkuha og Voters Certification sa nahisgutan nga buhatan sugod kagahapong adlawa.
Sumala sa pamahayag ni Comelec XI Asst. Regional Dir. Gay Enumerables, aduna nay bayad nga 75 pesos sa bu-ot magkuha sailang voters certification apan kasamtangan wala pay resibo ang buhatan.
Dugang niini nga ang tibuok Mindanao, aduna kini bayad kung magkuha og sertipikasyon apan wala matud pa nagapabayad ang Davao City kaniadto gumikan wala kini resibo nga mahatag.
Gani, ang maong pagbayad subay sa Resolution No. 9964 nga gi aprubahan kaniadto pang Abril 30, 2015 sa Commission on bank.
Hinuon, gitataw sab sa buhatan nga adunay exemption ang nahisgutang bayad alang sa voters certification sama na lamang sa mga senior citizen, solo parent, Person with Disability (PWD), indigeneous people ug uban pa.
Apan kinahanglan mag presenta og IDs ang mga nahisgutan isip pamatuod nga usa sa exempted nga indibidwal.
Gitin-aw sab sa buhatan nga kinahanglan aktibo ang pagrehistro sa usa ka botante aron makuha gilayon ang voters certification.
