DAVAO CITY – Gibutyag sa Davao City Police Office (XI) nga mikunhod na ang ihap sa krimen sa syudad sama sa pagpanulis ug pagpangawat atol sa gipatuman nga stay at home order sa lokal nga panggamhanan ning syudad.
Subay sa datos nga gipagula sa DCPO XI, sa bulan sa Oktubre, anaa lamang sa 6 ang natala nga ihap sa kaso sa pagpanulis samtang sa bulan sa Nobyembre, mitala na lamang og 4 ka ihap sa kaso sa pagpangawat.
Sumala sa pamahayag sa tigpamaba sa DCPO XI nga si P/Capt. Rose Aguilar, nakita niini nga posible ang hinungdan sa pagkunhod sa nahisgutang mga kaso mao ang kadaghanan sa mga tawo anaa lamang sa ilang mga panimalay subay sa lakang nga gipatuman sa lokal nga panggamhanan aron malikayan ang pagkuyanap sa COVID-19 sa syudad.
Dugang pa niini nga sa tuig 2019, adunay 74 ang natala nga ihap sa kaso sa pagpanulis diin mas taas kung itandi karong tuiga nga anaa lamang sa 38 ang ihap gikan sa bulan sa Enero hangtud Oktubre.
Samtang sa kaso sa pagpangawat, anaa lamang sa 94 ang natala gikan sa bulan sa Enero hangtud Oktubre ning kasamtangang tuig kung itandi sa 292 ka kaso nga natala niadtong milabay nga tuig.
Kalabot niini, padayon gihapon nagpahimangno ang mga otoridad nga dili gihapon magpakampante hilabi na karong umaabot nga kapaskuhan ug pabiling magbinantayon.
Hinuon, gipasalig sa DCPO nga naka-igmat gihapon ang mga kapulisan sama sa pagbantay sa mga simbahan, malls ug uban pa.
