DAVAO CITY – Gibutyag sa usa ka opisyal nga gibabagan sumala pa ang pipila ka mga indibidwal nga naghupot ug Safe Davao QR (DQR) code atol sa pagsulod nila dinhi sa dakbayan human nasayran nga ang ilang QR codes nga gihuptan ang invalid.
Una ng gibutyag ni City Human Resources Management Office (HRMO) head Lemuel Ortonio nga sagad sa mga naghupot ug DQRs mao kadtong nahimong kabahin sa pilot testing period.
Mipahimangno ang lokal nga kagamhanan nga kadtong naka-rehistro atol sa DQR pilot testing sa City Government of Davao employees kaniadtong Oktubre 25 hangtud 30, 2020 ang makonsidera nga invalid.
Gitino sab sa lokal nga kagamhanan nga ang DQR text codes nga adunay prefix nga “DC” ang invalid hinungdan nga mas maayo sumala pa nga magparehistro sa valid DQR link nga (persons.safe-davao.com).
Nasayran sab sa nahisgutan nga una na sila nga mipahimangno sa ilang mga empleyado nga dili ipahibalo ngadto sa uban ang online link sa pilot testing apan aduna pa gihapoy nakasupak ug gipakita ang link ngadto sa non-city government employees.
