DAVAO CITY – Padayon ang pahimangno karon sa mga sakop sa bureau of fire protection (BFP) 11 sa publiko nga likayan ang pagpalit ug refill nga mga butane gumikan kay delikado kini sa sunog ug disgrasya.
Kahinumduman nga mikabat sa 937 canisters nga gisudlan ug LPG kon Liquefied Petroleum Gas ang nakumpiska sa mga sakop sa Bureau of Fire Protection-Mati City Fire Station kagahapon sa buntag sa Magsaysay-1 sakop sa Barangay Central siyudad sa Mati.
Una ng mipahigayon ug inspeksiyon sa mga tindahan ang BFP ug ilang nasubay nga adunay naga-refill ug mga butane gamit ang LPG ingon man adunay namaligya usab nga mga gasolina nga gisulod ug botelya nga delikado sab sa sunog.
Gipasabot sa BFP nga ang mga butane canister wala gidisenyo aron nga butangan ug LPG gumikan kay dali sumala pa kini nga moinit ug posibleng hinungdan sa pagbusikad.
Mag-atubang sab sumala pa ug kaso ang bisan kinsa man nga masikop nga nalambigit sa susamang illegal nga aktibidad.
