DAVAO CITY – Subling mohatag ang lokal nga kagamhanan sa dakbayan sa Dabaw og tabang pinansiyal sa mga dapit nga grabeng naapektuhan sa lapad nga pagbaha hatud sa Bagyong Ulysses sa Luzon.
Sa resolusyon nga gipalabang sa 19th city council atol sa gipahigayong special session kagahapon, giaprubahan ang P6.5 million nga tabang pinansiyal alang sa upat ka mga probinsiya, duha ka syudad ug lima ka mga munisipalidad nga mideklara og State of Calamity human gikuso-kuso sa bagyo.
Gikanayon ni Konsehal Danny Dayanghirang, chairperson sa committee on Finance, Ways and Means, makadawat og tag P1 million ang probinsiya sa Cagayan, Camarines Norte, Isabela ug Quirino; P500,000 usab sa Tuguegarao ug Marikina ug P300,000 usab sa lungsod sa Claveria sa Cagayan, San Mateo ug Rodriguez sa Rizal ug sa lungsod sa Real ug Patnanungan sa Quezon.
Ang nahisgutang pondo ang gikan sa 30% sa Quick Response Fund (QRF) sa Disaster Risk Reduction and Management Fund o calamity fund sa dakbayan sa Davao.
Samtang, gikanayon usab ni Retired Colonel Alfredo Baloran, hepe sa Davao City Disaster Risk Reductiion and Management Council, itunol gilayon ang financial assistance pinaagi sa bank account sa nahisgutang mga Local Government Units.
