DAVAO CITY – Mihatag og katin-awan si Konsehal Jessica Bonguyan nga ang iyang gipalabang nga probisyon nga pagbawal sa videoke sa mga residential areas wala nagpasabot nga malikayan ang pagkatag sa COVID-19.
Sumala pa kang Bonguyan nga gipanday nila ang maong polisiya isip kabahin sa New normal nga pagtuon sa mga estudyante nga anaa lamang sa ilang mga panimalay.
Gawas niini, nakadawat sab sila og daghanang reklamo nga dili makatarong sa ilang pagtuon ang mga bata ingon man kadtong naga-work from home gumikan sa kasaba sa ilang palibot hatud sa ilang mga silingan nga nag-videoke.
Samtang mihatag sab og katin-awan ang opisyal nga “light” lamang ang nahisgutan nga ordinansa diin bugtong sa oras lamang nga alas 7:00 sa buntag hangtud alas 5:00 sa hapon ginadili ang pag-videoke ug mamahimo na matud pa nga magkanta-kanta pagsulod sa alas sais sa gabie hangtud na sa alas 10 sa gabie matag adlaw samtang mamahimo nga mag-videoke og tibuok adlaw sa adlaw nga domingo.
Gitataw sab sa opisyal nga mamahimong i-lift ang pagpatuman niini sa higayon nga mobalik na sa normal ang tanan ilabi na ang klase sa mga estudyante.
Pahayag ni Konsehal Jessica Bonguyan.
