DAVAO CITY – Bisan nga wala direkta nga naapektohan sa Bagyong Rolly ug Ulysses ang dakbayan sa Davao diin mihatud kini sa kasamtangan ug dakong kadaut sa Metro Manila ug Luzon, gipabilin pa gihapon karon sa Davao City Disaster Risk Reduction and Management Office (CDRRMO) ang ilang alert level gumikan sa nagpadayon nga moderate La Niña nga hatud sa localized thunderstorms.
Sumala pa kang CDRRMO chief Afredo Baloran, nga kanunay sila nga alerto ug wala gipadaplin ang posibilidad sa mga pagbaha. Kanunay sab sumala pa nila nga gipahibalo ang publiko kalabot sa kahimtang sa panahon ingon man ang mga advisories gikan sa Pagasa.
Nanawagan sab ang opisyal ngadto sa publiko nga motamud sa standard health protocols sa lokal nga kagamhanan ilabi na nga nagpadayon sab karon ang coronavirus disease (COVID-19) pandemic sama na lamang sa kanunay nga pagsuot ug facemask ingon man face shields ug kanunay nga manghugas ug kamot ug i-mentina ang ingon man magpabilin lamang sa panimalay kung walay mahinungdanon nga lakaw.
