DAVAO CITY – Boluntaryo gilayon nga gipangbugkag sa 26 informal settlers sa Purok 34, Taal sa Bangkal ning siyudad ang mga istraktura nga ilang gitukod daplin sa Talomo river o nagsilbing extensiyon sa ilang mga pinuy-anan.
Sumala pa kang Public Safety and Security Command Center (PSSCC) Head Angel Sumagaysay nga gibungkag gilayon sa mga residente ang extension sa ilang mga panimalay human ang gipahigayon nga dayalogo nga delikado ang manimuyo sa river dikes.
Nasayran nga sagad sa mga nahisgutan ang nagbutang ug extension aron nga himuon nila ug sala, kusina ug banyo. Magpahigayon sab sumala pa ang City Social Welfare and Development Office (CSWDO) ug initial listing sa mga residente nga hatagan ug food assistance.
Padayon ang panawagan karon sa lokal nga kagamhanan ngadto sa mga pamilya nga nanimuyo daplin sa kasapaan, dikes ug uban pa nga mga danger zones nga boluntaryo na lamang nga bungkagon ang ilang mga panimalay ug bakantehon ang area alang sa ilang kaluwasan ilabi na panahon nga mobundak ang kusog nga pag-ulan.
