DAVAO CITY – Gidayeg sa lokal nga kagamhanan ang gihimong lakang ni Pangulong Rodrigo Duterte diin mi-comply sumala pa kini sa rekisitos nga gipangayo sa siyudad pinaagi sa pag-presenta sa 24 to 72-hour negative reverse transcription-polymerase chain reaction (RT-PCR) test result ayha kini migawas sa Davao International Airport.
Kahinumduman nga mitunol ang pangulo sa iyang RT-PCR test negative result isip pagtamud sa gipatuman nga safety protocol sa tugpahanan dinhi sa siyudad.
Gilayon sumala pa nga gisumite ang iyang negative RT-PCR test sa records section sa airport.
Sumala pa kang Mayor Inday Sara Duterte-Carpio usa ka maayong ehemplo ang gihimo sa Pangulo nga angayan sumala pa nga sundon sa uban.
Nagpasabot sumala pa kini nga walay exempted nga mga pasahero sa mga rekisitos ug guidelines nga gipatuman aron lamang protektahan ang mga residente sa siyudad ingon man sa mga kasikbit nga siyudad ug probinsiya.
Kahinumduman nga gawas sa pagdala ug negative RT-PCR test result sa mga pasahero nga gi-isyu sa wala pa ang kapin 72 hours ayha ang ilang scheduled flight paingon dinhi sa siyudad, mamahimo sab nga maka-avail ug libre nga RT-PCR testing ang mga pasahero pag-abot sa DIA apan kinahanglan una nila nga hulaton ang resulta ayha tugutan nga maka-uli.
