DAVAO CITY – Gipangandaman na karon sa pamunoan sa Davao City Overland Transport Terminal (DCOTT) ang gikatakdang pagbalik sa biyahe sa mga bus nga gikan sa Manila paingon dinhi sa dakbayan sa Davao kini human ang gihatag niini nga go signal sa gobyerno.
Kahinumduman nga mismo si Davao City Mayor Inday Sara Duterte-Carpio ang mikumpirma nga ibalik na ang biyahe sa mga bus nga gikan Manila paingon sa Davao.
Hinuon gibutyag ni DCOTT Aisa Yusop nga wala kini mamahimong problema apan posibleng i-require sa mga pasahero nga gikan sa kaulohan ang pagdala ug negative results sa ilang RT-PCR test ayha sila tugtan nga makauli sa ilang tagsa-tagsa ka mga distinasyon.
Hinuon gipasalig ni Yusop nga hugtanon nga gipatuman karon sa DCOTT ang health protocols kini aron masiguro nga luwas ang mga pasahero batok sa Covid-19.
Kahinumduman nga sukad kaniadtong bulan sa Marso, temporaryo nga gihunong ang biyahe sa mga bus nga gikan sa kaulohan tungod sa Covid-19 pandemic.
Nakiglambigit na sab karon ang DCOTT sa LTFRB-11 ug sa uban pang hingtungdan nga ahensiya alang sa pagbalik sa dugang nga mga biyahe.
