DAVAO CITY – Padayon karon ang pag-awhag sa mga sakop sa kasundalohan ngadto sa mga rebelde nga anaa sa bukid nga mas maayong mobalik na sa sabakan sa kagamhanan.
Kahinumduman nga anaa sa 21 ka mga kanhi miyembro sa NPA sa Davao Oriental ang nakadawat ug Financial assistance gikan sa gobyerno ilalom sa Enhanced Comprehensive Local Integration Program (E-CLIP) sa Davao Oriental.
Gitunol sa mga nahisgutan ang livelihood ug immediate assistance, ug firearms remuneration nga nagkantidad ug P3.8 million.
Sumala sa Davao Oriental Provincial Government, nakadawat ang matag usa kanila ug tig-P50,000 nga livelihood assistance ug tig-P15,000 nga immediate assistance.
Samtang sa mga mitahan sa ilang armas ang nakadawat ugfirearms remuneration nga kantidad tanan ug P2.5 million.
Mismong nanguna sa distribusyon si Governor Nelson Dayanghirang diin gitambagan sa opisyal ang kanhi rebelde nga gamiton ug tarong ang tabang pinansiyal aron nga makatabang kini kanila ug sa ilang pamilya.
Mipailalom sab ang mga nahisgutan sa serye sa mga lecture ug workshop sa TESDA ug DOLE aron makamugna ang mga nahisgutan sa ilang business plan.
Subay sa datos sa probinsya, adunay 400 ka mga Former Rebels ang natabangan sa E-CLIP sukad tuig 2013.
