DAVAO CITY – Gipailalom karon sa Covid-19 test ang mga governador, military ug kapulisan ingon man health officials da Davao region nga una ng misalmot sa gipahigayon nga meeting kauban si Local Governments Secretary Eduardo Año sa Philippine National Police (PNP) regional camp ning siyudad sa milabay nga semana human nga subling nagpositibo ang opisyal sa Covid-19.
Gi-awhag sab ang mga mitambong sa maong tigom nga mopailalom sa self-quarantine, obserbahan kung adunay sintomas kini base sa DOH guidelines.
Kahinumduman nga mipailalom sa RT-PCR test si Año sa milabay nga semana human nga nakasinate ug flu-like symptoms kalakip na ang sore throat ingon man pagpanakit sa kalawasan kaniadtong Agosto 13 ug nasayran nga nagpositibo kini sa COVID-19 hinungdan nga gilayon kini nga gi-isolate.
Kahinumduman nga una ng nagpositibo ang opisyal sa virus kaniadtong Marso 31 ug nagnegatibo kaniadtong Abril 13.
Pipila sa mga mitambong sa maong tigom ang gilangkuban nila ni governor Jayvee Tyron Uy sa Davao de Oro, Gov. Edwin Jubahib sa Davao del Norte, Douglas Cagas sa Davao del Sur, Claude Bautista sa Davao Occidental ug Nelson Dayangharing sa Davao Oriental samtang si Davao City Mayor Sara Duterte ang misalmot lamang pinaagi sa video conference.
