DAVAO CITY – Gipasabot sa City Health Office (CHO) kung nganong kinahanglan ipatuman ang hard lock down sa Purok 8 sa Brgy. Kapitan Thomas Monteverde Sr. sa Agdao District ning siyudad kini aron masiguro nga dili na madungagan ang kaso sa covid-19 sa lugar.
Kahinumduman nga gisugdan ang nahisgutan nga kamandoan pasado ala una kagahapon sa hapon diin mas gipahugtan karon ang pagpatuman ug seguridad sa Barangay aron nga walay makagawas nga residente ug walay makasulod usab sa maong dapit. Kalakip karon ang maong dapit sa Very High Risk Barangay gumikan sa ubay-ubay nga nagpositibo sa virus.
Sumala kang Davao City Mayor Inday Sara Duterte-Carpio, kinahanglan gilayon magpatuman ug hard lock down sanglit laoman sumala pa nga madungagan pa ang mga matakdan niini.
Hinuon gipasalig sa Mayor nga adunay ihatag nga pagkaon ang lokal nga kagamhanan sa mga apektadong residente samtang dili pa tugtan ang mga nahisgutan nga makagawas.
