DAVAO CITY – Naglaom ang ahensiya sa Department of Education (DepEd) 11 nga mosaka pa ang ihap sa mga magpa-enroll sa school year 2020-2021 human nga gilugwayan karon ang enrollment hangtud Hulyo 15 ning tuig kasamtangan.
Laoman nga mosaka pa ang ihap sa mga enrollees human nga daghanan ang mi-avail sa Eskwela Davao nga usa ka educational assistance program sa lokal nga kagamhanan diin ang mga benepisiyaryo niini mao kadtong walay sarang nga ikagasto sa ilang pagtungha.
Nasayran nga kadaghanan sa mga ginikanan gipa-enroll ang ilang mga anak gipaagi sa text, pag-message sa FB sa mga magtutudlo gumikan sa kahadlok pa gihapon sa Covid-19.
Kahinumduman nga sa Agosto 24 ning tuig kasamtangan gitakda ang pag-abli sa klase diin himuon kini nga blended learning o pinaagi sa online class o modular.
Naglaom sab ang DepEd nga maangkon nila ang target sa mga magpa-enroll karong tuiga bisan nga nakasinate ug krisis ang nasod hatud sa Covid-19 pandemic.
