DAVAO CITY – Gipahugtan pa karon sa dakbayan sa Davao ang seguridad ug anti-terrorism efforts hinungdan nga gilunsad karon ang “Culture of Security” usa ka kampanya aron awhagon ang mga dabawenyos nga kinahanglan kanunay nga mag-igmat. Ang maong kampanya adunay tema nga “May Nakita? Dapat Magsalita!” diin gipangunahan kini sa lokal nga kagamhanan ug Task Force Davao dungan usab sa pag-isyu ni Mayor Inday Sara Duterte sa Executive Order No. 41, o an Order Encouraging Dabawenyos to Adopt the Culture of Security as Part of their Way of Life.
Laraw sa maong inisyatibo nga palig-onon pa ang kahusay ug kalinaw aron nga mapugngan ang bisan unsa man nga klase sa terorismo sa siyudad.
Gi-awhag ang mga dabawenyos nga kinahanglan i-practice ang upat ka klase sa culture of security nga gilangkuban sa Volunteer, pag-Report, pagpahinumdom ug pagpartisipar.
Nagpasabot kini nga kung adunay mamatikdan nga mga kadudahan nga mga indibidwal sa palibot ingon man aktibidad, gilayon kini nga ipahibalo sa security units.
Sumala pa kang Col. Consolito Yecla, Commander of the Task Force Davao, nga ang pag-report sa kadudahan nga mga tawo ug aktibidad mamahimong makalikay sa kadaut ug walay kinabuhi nga makalas.
Mamahimo sumala nga motawag ang mga Dabawenyos sa Task Force Davao hotline numbers: 0917 131 4333, 0999 227 1111, ug Tel. No: (082) 224 0911.
