DAVAO CITY – Gikumpirma ni Brig. Gen. Filmore Escobal, director sa Police Regional Office XI nga giluwas ang usa ka Manobo nga inahan ug ang iyang singko anyos nga anak sulod sa UCCP-Haran compound.
Sumala pa sa opisyal nga misulod sumala pa ang pamilya niini sa Haran kaniadtong Pebrero 28, 2018.
Ang nahisgutan nga inahan nagpangidaron ug 44 anyos samtang ang iyang mga anak nag-edad ug 19 anyos ang pinakamagulang samtang 5 anyos ang pinakabata.
Sumala pa kang Escobal, nakadawat sila ug impormasyon nga andam na nga mobiya ang nahisgutan nga IP family sa Haran gumikan sa kagutom sukad nga nagsugod ang community quarantine sa Davao Region hinungdan nga nakadesisyon nga mopapauli na lamang sa ilang komunidad.
Nagpadala si Escobal ug mga personahe aron nga makiglambigit sa Intelligence Unit sa DCPO aron nga luwason ang maong pamilya.
Gani, samtang anaa ang presensiya sa kapulisan sa nahisgutan nga dapit, aduna sumala pay mga “spotters” sa compound ang nagakuha ug hulagway ingon man videos sa mga government security forces.
Malampuson nga naluwas ang pamilya sa lumad ug gipasakay gilayon kini sa public utility jeepney dayon gidala sa Regional Health Service XI alang sa health check-up.
Gihatagan sab ang mga nahisgutan ug tambal ingon man bitamina. Sumala sa wala hinanganli nga lumad, nabalaka siya sa kaugmaon sa iyang igsuon gumikan kay anaa pa gihapon kini sulod sa haran.
