DAVAO CITY – Bisan kung mabutang na ang dakbayan sa Davao ilalom sa community quarantine, gibutyag ni Mayor Sara Z. Duterte-Carpio nga dili pa gihapon sigurado kung makapadayon na ang Roxas Night Market sa ilang operasyon.
Una ng gimando sa Mayor kaniadtong milabay nga Marso ang pagpasara sa Night Market sa Roxas Avenue kalakip na ang uban nga public parks pipila ka adlaw human nga gideklara sa national government ang state of public health emergency gumikan sa bahad sa coronavirus disease (Covid-19).
Gipatuman gilayon ang closure ayha ang deklarasyon sa mandatory community quarantine kaniadtong Marso 16.
Naglaom ang Mayor nga ang temporaryo nga pagpasira sa Roxas night market dili molungtad hangtud sa katapusan karong tuiga.
Nakasabot sumala pa ang Mayor nga kinahanglan ipadayon ang operasyon sa night market, nga maoy usa sa gigikanan sa income ingon man tourist attraction sa dakbayan.
Naglaom karon ang Mayor nga mo-graduate na ang siyudad sa community quarantine ug mobalhin na sa “new normal” aron nga ang night market ug uban pang commercial establishments ang mamahimo na nga makapadayon sa ilang operasyon.
