DAVAO CITY – Aron masiguro nga dili na madungagan pa ang kaso sa Covid-19 sa mga Barangay nga siyudad nga giilang High risk sa nahisgutan nga virus, nagpatuman karon ug mga nagkadaiyang lakang ang nahisgutan nga dapit aron masigurong hugtanon nga mapatuman ang mga health protocols sa ilang mga residente.
Samtang gipasalig karon sa mga otoridad partikular na ang mga sakop sa Task Force Davao (TFD) nga motabang sila pagbantay sa mga Barangay nga taas ang kaso sa Covid-19 aron masiguro nga dili makagawas ug walay makasulod sa nahisgutan nga mga dapit.
Sa kasamtangan, anaa na sa 37 ang gipatuman nga Household lockdown, 4 ang compound lockdown, 4 ang street lockdown, 1 ang purok lockdown o anaa sa kinatibuk-ang 46 ka mga lockdown ang gipatuman sa siyudad tungod sa taas nga kaso sa Covid-19.
Samtang ang mga Barangay nga taas ug kaso sa Covid-19 ang gilangkuban sa 22-C, 23-C, Agdao proper, Bucana, Buhangin Proper, Cabantian, Leon Gracia, Maa, ug Talomo proper.
Una na sab nga gibutyag ni Col. Consolito Yecla, commander sa TF Davao, anaa sa 2 ka squad ang ilang gi-deploy sa Brgy. 23-C samtang laing team ang ilang gipamonitor sa Leon Garcia sa Agdao nga taas sab ang kaso sa Covid-19.
