DAVAO CITY – Gihatagan ug importansiya sa Department of Education (DepEd) ang kamahinungdanon sa paggamit ug radyo ingon man Telebisyon sa pagpadayon sa klase karong tuiga kini tungod na sab sa padayon nga pagkuyanap sa covid-19 nga delikado sa panglawas sa mga bata sa higayon nga ipahigayon ang face to face klase.
Sumala pa kang Dodong Atillo, tigpamaba sa DepEd-11, gamiton tanan nga resources sa gobyerno sama sa TV ug radyo aron nga maabot ang pagtudlo bisan nga nanimuyo sa mga hilit nga lugar ang mga estudyante.
Samtang gitataw sab ni Atillo nga dungan sa pagsugod sa enrollment karong adlawa, hangtud sa Hunyo 1.
Kinahanglan i-contact sa mga ginikanan ang kanhi magtutudlo sa ilang mga anak aron nga kini na ang mo-proseso sa sunod nga grade level sa ilang anak.
Gihimong example ni Atillo nga kung grade 1 kaniadtong milabay nga tuig ang bata, kinahanglan nga i-contact sa ginikanan ang kanhi ma-estra niini aron kini na ang mo-enroll sa ilang mga anak sa grade 2.
Himuon ang maong lakang isip kabahin sa remote enrollment sa ahensiya hangtud nga magsugod na ang klase.
