DAVAO CITY – Gibutyag ni Davao City Mayor Inday Sara Duterte Carpio nga usa sa gihimo karon sa lokal nga kagamhanan mao ang pag-manage na lamang sa mga confirmed Covid-19 cases diin mas gipaspasan pa ang pagpangita sa mga nakahimamat niini.
Tipik lamang kini human nga gibutyag sa Mayor nga walay ipatuman nga duruha ka bulan nga lockdown kini tungod daghanang mga tawo ang dili na makapundo sa ilang panimalay sulod sa nahisgutan nga panahon.
Una na sab nga gibutyag sa Mayor nga kung dili gayud malikayan ang pagsaka sa kaso sa Covid-19 ug daghanan na ang mamatay, himuon sa lokal nga kagamhanan ang cremation ug mag-mass grave.
Gibutyag sa Mayor nga kinahanglan lamang karon ug igong pag-manage sa kaso sa Covid-19 sanglit dili pa kini mawala ilabi na nga wala pay bakuna batok sa virus.
Mas dakong tabang sumala pa karon ang paspas nga resulta sa Covid test nga moabot na lamang sa 2-3 ka adlaw kung itandi sa milabay nga bulan nga molungtad pa ug sobra sa usa ka semana.
Gitataw ni Mayor Inday nga mas mopaspas pa ang pagpagawas ug resulta sa test kung madungagan na ang testing center sa siyudad.
Una na sab nga gibutyag sa Mayor nga posibleng malugwayan pa ang General Community Quarantine (GCQ) o mag- Modified General Community Quarantine (MGCQ) na ang siyudad human ang Mayo 31, 2020.
