DAVAOP CITY – Aron masiguro nga walay nagpositibo sa Corona virus disease (Covid-19) sa presohan, gipailalom sa Davao City Police Office (DCPO) ang anaa sa 400 ka mga peneriso sa Covid-19 Rapid diagnostic Test.
Tumong sumala pa niini nga mapabilin ang maayong panglawas sa mga peneriso ilabi na nga anaa lamang sila sa usa ka lawak.
Kalakip sa nahisgutan nga ihap ang 24 ka mga binilanggo nga anaa sa Investigation and Detective Management Branch (IDMB) sa DCPO.
Una ng gibutyag ni Pol Col. Kirby John Kraft, director sa DCPO, nga kun ugaling adunay magpositibo sa nahisgutan nga test, ila gilayon kini nga i-refer sa City Health Office (CHO) aron nga madala sab kini sa isolation center.
Gikanayon sab sa opisyal nga kung adunay mga suspek nga masikop sa operasyon sa kapulisan, ila una kini nga ipailalom sa susama nga test ayha isulod sa presohan.
Gawas sa mga peneriso, isunod sab nila sa pagpailalom sa maong test ang frontliners nga mga kapulisan ilabi na kadtong nadestino sa gawas.
