DAVAO CITY – Subling gibutyag ni Davao City Mayor Inday Sara Duterte-Carpio nga walay igong rason aron nga magsuroy-suroy sa gawas ilabi na kung wala kini importante nga lakaw ilabi na sa mga dapit nga daghan ug tawo.
Kahinumduman nga daw excited nga makagawas ang mga tawo kagahapong adlawa human nga nagtapok kini sa mga kadalanan samtang naghulat ug masakyan dungan sa pagpailalom na sa siyudad sa General Community Quarantine (GCQ).
Gipasabot ni Mayor Inday nga walay rason nga magsuroy-suroy lamang sa mall sanglit ang access nga FM pass ang alang lamang sa pagpalit ug pagkaon, trabaho ug pagpalit ug medisina.
Subli nga gipahimangnoan sa opisyal ang mga Dabawenyo nga kung mamahimo likayan ang pag-adto sa mga barangay ug mga lugar nga delikado sa Covid-19 ingon man ang mga dapit nga taas ang risgo nga mataptan ug virus sama na lamang sa mga public markets, supermarkets ug uban pang mga establismiyento.
