DAVAO CITY – Subling mipahimangno ang ahensiya sa Department of Interior and Local Government (DILG) nga seryoso ang gobyerno sa paghatag ug P30,000 nga reward alang sa mga tawo nga makatudlo ug mga opisyal nga nag-abuso sa Social Amelioration Program (SAP) fund. Sumala pa kang Alex Roldan, DILG XI director, nga nakadawat na sila ug memorandum gikan kang Secretary Eduardo Año kalabot sa maong reward aron nga malimpiyohan ang SAP distribution.
Gi-awhag ni Roldan ang publiko nga mokuha ug hulagway o videos isip suporta sa ilang ipadangat nga reklamo.
Una ng gibutyag ni Pangulong Rodrigo Duterte nga P30,000 ang reward sa mga makahatag ug impormasyon sa mga government officials nga nag-abuso sa cash subsidy nga alang sa mga benepisiyaryo.
Gimandoan na sab sa ahensiya ang kapulisan nga subayon ang mga ginaduso nga reklamo kalabot sa pagpanghatag ug SAP.
Una na sab nga gibutyag ni Roldan nga aduna nay usa ka kapitan sa Davao Oriental ang napasakahan ug kaso human nga gikuhaan niini ang tabang pinansiyal nga gidawat sa mga benepisiyaryo sa SAP.
