DAVAO CITY – Gireklamo sa mga beneficiary sa Special Amelioration Program (SAP) sa Barangay Alta Vista, Bansalan Davao del Sur ang ilang barangay Kapitan gumikan sa pagpangayo ug tag-usa ka libo ka pesos matag usa isip donasyon.
Apan, gitin-aw ni Barangay Captain Randy Navarro nga ang natigum nga donasyon ang gi-apod-apod usab sa barangay ngadto sa 49 ka lain pang mga residente nga wala makadawat ug SAP, diin ang matag usa kanila ng nakadawat sumala pa ug tag-2,800 pesos.
Gipamugos usab ni Kapitan Navarro nga dili pinugsanay ang paghatag sa maong kantidad nga ihulog pinaagi sa gibutang nga donation box sulod sa ilang barangay ug naay pirmahan aron pamatuod nga boluntaryo kining mihatag sa nahisgutang kantidad.
Hinuon, giangkon sa maong opisyal nga kung siya ang pabut-on mas labing maayo nga modonate ang mga benepisyaryo ug tag-usaka libo ka pesos aron mabahinan pud ug dako-dako kadtong mga wala maapil sa SAP.
Apan, mi-reklamo ang mga SAP beneficiary gumikan kay sobra kaayo ka dako ang usaka libo ka pesos aron i-donate sanglit gikinahanglan usab sumala pa nila ang nahisgutang kuwarta.
