DAVAO CITY – Gilugwayan sa ikatulong higayon ang voter’s registration sa Commission on election (Comelec) hangtud sa Hunyo 30 kini tungod pa gihapon sa bahad sa Corona virus disease (Covid-19).
Una ng gibutyag sa ahensiya nga ipatuman nila ang nahisgutan nga lakang human ang nauna nga deklarasyon sa kagamhanan nga lugwayan ang enhanced community quarantine sa pipila ka bahin sa nasod nga nagpabiling taas ang risgo sa Covid-19.
Sumala pa kang Atty. Krisna Caballero, tigpamaba sa Comelec, nanghinaut pa gihapon ang ahensiya nga unta matapos na ang krisis sa covid-19 aron nga makapadayon sab sila sa ilang trabaho ug dili maapektohan ang ilang preperasyon alang sa 2022 nga eleksiyon.
Nagpahimangno sab ang nahisgutan nga kung matapos na ang krisis, dili lamang una nila ipahigayon ang mga satellite registration aron masiguro nga malikayan ang covid-19 ug mapatuman ang social distancing.
