DAVAO CITY – Bisan nga wala’y natalang bag-ong kaso sa Covid-19 sa Davao region sa milabay nga mga adlaw, girekomenda sa mga Health experts sa Davao Region nga dili gilayon tapuson ang gipatuman nga community quarantine.
Una nang gibutyag ni Southern Philippines Medical Center (SPMC) Chief of Hospital Dr. Leopoldo Vega, hinay na nga nakontrola karon sa rehiyon ang kaso sa Covid-19 ug kung mosaka man kini, dili paspas ug hinay lamang.
Sa higayon sumala pa nga walay matalang kaso sa mga mosunod nga adlaw, makonsidera sumala pa nga na-kontrola na sa siyudad ang nahisgutan nga balatian.
Kahinumduman nga karong adlawa hisgutan ni Davao City Mayor Inday Sara Duterte-Carpio ug sa mga doktor kung unsa ang mamahimong lakang nga himuon dungan sa pagtapos sa Enhanced Community Quarantine karong Abril 19.
Nanawagan pa gihapon karon ang mga health experts nga batasanon pa gihapon ang pagsuot ug face mask ug magpabilin lamang sa mga panimalay ug dili mogawas kung dili mahinungdanon.
