DAVAO CITY – Gipasabot ni Davao City Mayor Inday Sara Duterte-Carpio nga ang pagpatuman ug Extreme enhanced community quarantine (EECQ) magdepende pa gihapon kung unsa ang kalambuan sa gipatuman karon nga Enhanced Community Quarantine (ECQ).
Una ng gibutyag sa Mayor nga wala niya gipadaplin ang posibilidad nga ipahimutang ang dakbayan sa maong lakang sa higayon nga matapos na ang ECQ sa abril 19.
Mahinungdanon sumala pa karon kung paunsa mapugngan ang virus apan kung ipatuman ang EECQ, laoman sumala pa nga dyutay na lamang nga mga establisyemento ang mag-abli ug pipila na lamang ka mga empleyado ang motrabaho.
Gitataw sa Mayor nga kung mokooperar ang mga tawo ug motamud sa mga guidelines nga gipagula sa lokal nga panggamhanan, mamahimong mapugngan sa health sector ang pagkatag sa virus. Kung mahitabo sumala pa kini dili na kinahanglanon pa ang pagpatuman sa EECQ.
Gipahimangnoan sab ni Mayor Inday ang mga nanag-iya ug negosyo nga mangandam sa sistema sa physical distancing sa higayon nga mobalik na ang dakbayan sa ordinary community quarantine. Mahinungdanon sumala pa kini aron hingpit na nga mawagtang ang kaso sa covid-19 dinhi sa dakbayan.
