DAVAO CITY – Pipila ka adlaw sukad nga gisugdan ang enhanced community quarantine (ECQ) kaniadtong Abril 4, wala pa natapos karon sa lokal nga panggamhanan ang unang round sa pagpanghatag og relief goods sa pipila ka mga barangay sa siyudad.
Sumala pa kang Davao City Mayor Sara Duterte-Carpio, target sa sa siyudad nga matapos ang unang round ugmang adlawa, Abril 8.
Subay sa data gikan sa City Social Welfare and Development Office (CSWDO), anaa sa kapin 184,784 grocery packs ang nahatag sa pipila ka mga barangay sa siyudad sa milabay nga duruha ka semana.
Target sumala pa nila nga mahatag ang 350,000 grocery packs atol sa first round.
Una ng gibutyag sa Mayor nga dili kalikayan ang hinay nga distribusyon sa relief packs gumikan sa kawad-on ug tawo nga mo-repack niini.
Samtang nagpahimutang sumala pa karon ang lokal nga panggamhanan ug hot meal stations sa 98 ka mga barangay sa siyudad nga manghatag ug libre nga lomi ug lugaw matag alas dies sa buntag hangtud na sa alas singko sa hapon matag adlaw.
Target sa siyudad ang mga barangay nga anaa sa coastal ug urban areas diin nanimuyo ang mga informal settlers ug giilang vulnerable nga mga pamilya.
