DAVAO CITY – Mi-apela ang usa ka environmental organization ngadto sa publiko nga ilabay og tarung ang mga ginamit nga mga face masks ug uban pang sanitary items nga gamit karon isip pangontra sa coronavirus disease (Covid-19).
Sumala pa kang Interfacing Development Interventions for Sustainability (IDIS) Executive Director Chinkie Peliño-Golle nga angayan sumala pa nga ilabay ug tarung ang mga ginamit nga masks ug tissues aron nga mapugngan ang pagkatag sa virus ingon man ma-protektahan ang kinaiyahan.
Nanawagan sab kini sa environment agencies sama sa Department of Environment and Natural Resources pinaagi sa Environmental Management Bureau (DENR-EMB), ug City Environment and Natural Resources Office (Cenro) nga manguna sa tukma nga paglabay sa nahisgutan nga mga hugaw.
Gisugyot sa nahisgutan ang paggamit na lamang ug reusable masks sama sa cloth mask sanglit mamahimo kini nga labhan ug dili makadugang ug basura.
Sa kasamtangan, dili sumala pa nila mamonitor ang tukma nga disposal karon sa susama nga basura gumikan kay mitamud sila sa tambag ni Davao City Mayor Sara Duterte-Carpio nga mopahigayon ug self-quarantine dungan sa deklarasyon sa state of public health emergency sa nasod.
Subli nga gibutyag ni EcoWaste Coalition Zero Waste campaigner Jove Benosa ang panawagan sa Department of Health (DOH) nga dili sumala pa kinahanglan nga mogamit kanunay ug masks kung molakaw inay mas gikinahanglan ang paggamit ug mga surgical mask sa mga tawo nga adunay sakit ingon man sa mga doktor nga anaa sa hospital.
