Aksidente ug dili suicide ang nahitabo kang Police Staff Sgt. Renante Mercado, desk officer sa San Pedro Police station kinsa namatay human mabuthi sa iyang service firearm.
Ang nahisgutang pahayag ang gipagawas ni Police Major Jack Leon Tilcag, ang station commander sa San Pedro Police station taliwala sa nang-gawas nga mga negatibong espikulasyon.
Sumala pa ni Tilcag, nasaksihan mismo sa usaka Police auxillary ang nahitabo ug mao kini mismo ang misaysay ngadto kaniya.
Ka-igo na sumala pa ang testimonya sa police auxillary nga si Chelo Maderal aron hingpit nang ihunong ang mga sayop ug na-una nang pagtuo sa ubang mga tawo nga nag-pusil sa iyang kaugalingon ang nahisgutang police.
Dugang pa ni Tilcag nga unang duty ni Mercado kagabii isip Desk officer sa San Pedro Police station.
Si Police staff Sgt. Renante Mercado, usa sa mga desk officer sa San Pedro Police station.
Sa pikas bahin, sa ngalan sa tanang mga ginsakupan sa Davao City Police Office, mipadangat si Tilcag og dakong pahasubo sa pamilya ni Mercado.
Hangtud karon, pabilin sumala pa silang nakurat sa wala gilaumang panghitabo.
Nanawagan kini sa katawhan ug pagsabot ug mihangyo nga ihunong na ang pagpakatag ug sayop ug malsiyosong mga mensahe sa social media ug respetuhon ang namatay nga police ug ang nagsubo niini nga pamilya.
Gipasalig usab niini nga ilalom sa iyang kadumalahan nga madawat sa pamilya ni Mercado ang gikinahanglan nga financial assistance ug nagmando na usab siya ug mga personahe nga motabang sa miembro niini sa pamilya sa pagproseso sa iyang mga claims.
