DAVAO CITY – Daghanang mga armas ang gitahan sa mga kanhi sakop sa New People’s Army (NPA) sa Police Regional Office (PRO)-11 dungan sa ilang pagsurender gumikan sa kalisud sa ilang sitwasyon ug kahadlok nga basin sila na sab ang sunod nga mamatay.
Kahinumduman nga gipangunahan sa usa ka alyas “Jofel” nga nagsilbing political instructor sa Front committee 88 sa NPA nga naglihok sa Agusan del Sur ang pagbalik sa sabakan sa kagamhanan gumikan kay dili na sumala pa nila ma-antus ang ilang kahimtang sa bukid ug buot na sab nila nga makauban ang ilang mga kabanay.
Pipila sa mga armas nga ilang gitahan ang gilangkuban sa usa ka M14 riffle; usa ka Spring field garand riffle; usa ka Anti-personnel mine; 3 ka M14 magazines; 42 ka rounds sa 7.62 ammunition; 1 ka clip sa Cal. 30 ug 9 ka rounds sa .30 ammunition.
Gibutyag sab ni Police Brig. Gen. Felmore Escobal, regional director sa Police Regional Office (PRO) 11, nga gitudlo sab sa mga rebel returnees ang lubnganan sa ilang duruha ka mga kaubanan nga napatay hinungdan nga gitambagan sa opisyal ang mga kabanay sa mga biktima nga makiglambigit sa Provincial Police Office sa Agusan del Sur.
Samtang gibutyag sab ni alyas Jofel, nga nakadesisyon siya nga mobalik sa sabakan sa kagamhanan gumikan kay dili na makaya sa iyang konsensiya ang mga gihimo sulod sa kalihokan.
