DAVAO CITY – Hugtanon karon nga gimonitor sa Philippine Coast Guard (PCG) Davao ang mga pantalan ug coastal areas sa siyudad aron nga malikayan lamang ang pagsulod sa mga buhi nga baboy ug pork products nga gikan sa mga lugar nga naapektohan sa African Swine Fever (ASF).
Sumala pa kang PCG Davao station head Commander Gary Laynesa nga doble ang ilang pagpaningkamut human nga nagpositibo sa ASF ang Davao Occidental.
Kalakip sa ilang ipatuman nga mga sumbanan mao ang pagpahigayon og hugtanon nga screening sa watercraft nga posibleng gikargahan sa mga buhi nga hayop ug pork products.
Gitataw sab ni Laynesa nga ang joint seaborne patrol sa municipal waters sa Don Marcelino ang gipatuman aron lamang masiguro nga walay buhi nga baboy ug meat products nga makasulod pinaagi sa pagsubay sa mga baybayon nga paingon dinhi sa siyudad nga posibleng makapabutang sa risgo sa swine industry.
Kahinumduman nga nagpatuman karon ang lokal nga panggamhanan og pag-ban sa pag-angkat og karneng baboy gikan sa mga lalawigan sa Davao del Sur ug Davao Occidental human nga namatay ang liboan ka mga baboy tungod sa ASF sa Don Marcelino, Davao Occidental.
