DAVAO CITY – Naglaum si City Tourism Office (CTO) Generose Tecson nga dungan sa outbreak sa Novel Coronavirus (2019-nCoV), dili maapektohan ang paglambo sa turismo sa dakbayan sa Davao ilabi na nga ang mga Chinese visitors ang nakatampo og 0.58-percent sa kinatibuk-ang tourist arrivals sa siyudad sa milabay nga tuig.
Nasayran sa opisyal nga sa milabay nga tuig, nakatala ang dakbayan og kinatibuk-ang 2,573,990 arrivals sa milabay nga tuig nga miabot ngadto sa 7.55-percent gikan sa 2,393,384 sa 2018.
Sa kinatibuk-ang arrivals, 182,825 niini ang mga foreigners.
Samtang gibutyag ni Davao City Chamber of Commerce and Industries Inc. president John Tria nga wala sumala pay ipatuman nga kanselasyon sa mga events sa dakbayan bisan nga nagpabilin karon ang global scare sa 2019-nCoV.
Una ng gibutyag ni City Mayor Sara Duterte nga hugtanong gimonitor karon sa Department of Health ug uban pang national government agencies ang mga sumbanan aron nga malikayan ug makontrola ang pagkatag sa virus.
Mihangyo ang mayor nga likayan ang pagpakatag og sayop nga impormasyon aron nga dili kini muhatod og grabe nga kahadlok sa publiko.
Kahinumduman nga una ng gi-aprubahan ni Pangulong Rodrigo R. Duterte ang travel ban sa mga bisita gikan Hubei province sa China diin naggikan ang 2019-nCoV ingon man ang uban pa nga lugar sa China diin mikatag na ang nahisgutan nga disease.
