DAVAO CITY – Mamahimo sumala pa makagawas sa ilang pagkabilanggo ang 156 ka mga trabahante sa usa ka banana plantation sa Carmen, Davao del Norte sa higayon nga makaduso og piyansa.
Kahinumduman nga gikustodiya sa kapulisan ang mga nahisgutan human ang ilang gipahigayon nga pagbarikada kagahapon aron lamang mababagan ang nanag-iya sa kompanya ingon man pagkawat sa mga produktong saging.
Una ng gibutyag ni Police Major Jay Nocidal, ang OIC sa Carmen Municipal Police station, nga pormal na nilang giduso ang reklamo sa korte batok sa mga nahisgutan sama na lamang sa mga kasong Grave Coersion ug theft.
Gitataw ni Nocidal nga nakadawat sila og reklamo kalabot sa nahitabong kawat sulod sa Puyod Farm sa Brgy. Mabuhay Carmen Davao del Norte hinungdan nga dali sila nga miresponde ug ilang naabtan ang kapin usaka gatus ka mga trabahante nga naa pa sa pagpang-harvest og mga saging.
Wala na sab nila naabtan ang 4 ka mga truck nga puno og karga nga saging nga gikanayong gidala sa Panabo area.
Kahinumduman nga gidala sa kapulisan ang 156 ka mga trabahante sa Municipal Gym sa Carmen Davao del norte diin temporaryo nga gipangbilanggo ang mga nahisgutan.
Usa sa mga gireklamo sa mga nahisgutan ang wala sumala pa paghatag og tarung nga suweldo sa kompanya.
