DAVAO CITY – Gipasalig ni Dr. Wilson Lim, medical officer 4, Davao station ilalom sa Bureau of Quarantine nga gipahugtan pa nila karon ang pagmonitor sa mga tugpahanan ingon man pantalan ning siyudad aron lamang masiguro nga dili makasulod ang gikanayong new corona virus nga gikan sa nasud China.
Sumala pa kang Dr. Lim nga usa sa ilang gihimo sa kasamtangan mao ang pagpahimutang og thermal scanner sa tugpahanan aron masubay ang mga pasahero ilabi na kadtong gikan sa China kung aduna ba kini sintomas sama na lamang sa kalintura ug daghanan pa.
Gawas sa China, kalakip sab sa ilang bantayan kadtong gikan sa Hongkong ilabi na nga adunay direkta nga flight niini ang siyudad.
Sa higayon nga adunay mga pasahero nga makitaan og sintomas ug gikan kini sa apektadong lugar, ipailalom gilayon nila kini sa isolation aron nga malikayan ang pagkatag sa sakit.
Nanawagan na lamang ang nahisgutan sa publiko nga aron malikayan ang pagkatag sa nahisgutan nga sakit, kinahanglan nga batasanon ang paghugas sa kamot ug ipabilin nga baskug ang panglawas.
Kinahanglan sab sumala pa nga tabunan ang baba sa higayon nga mo-ubo ug likayan ang pag-adto sa mga dapit nga daghanan og tawo.
