DAVAO CITY – Giduso sa konsehal ning dakbayan ang pag-institutionalize sa Public Safety and Security Command Center (PSSCC) nga mag-operate subay sa ilang mandato.
Sumala pa kang konsehal Mabel Sunga Acosta, committee on peace and public safety chair, moduso siya og ordinansa sa pag-institutionalize sa PSSCC sanglit nagpabilin pa kini nga ilalom sa City Mayor’s Office (CMO).
Gitataw ni Acosta nga tungod ang nahisgutan nga center nagpabilin nga ilalom sa CMO, wala sumala pa kini’y kaugalingon nga organizational budget.
Sumala pa kang PSSCC head Angel Sumagaysay, naglisud karon ang ilang buhatan aron mamentina ang ilang security of employment sa ilang mga personahe sanglit kadaghanan niini ang ilalom lamang sa contractual o job order.
Dugang ni Sumagaysay nga ang kasamtangan nila nga status maoy nakababag nga maka-hire sila og dugang mga personahe.
Dili sab sumala pa sila mamahimong makapadala og personahe aron ipailalom sa training ug seminars tungod sa ilang sitwasyon.
Gumikan kay anaa ang PSSCC sa laing departamento, kinahanglan nila og dugang nga pundo aron nga mahimo nila ang ilang mandato pinaagi sa pakiglambigit sa uban nga mga safety and security units sa siyudad.
