DAVAO CITY- Kabsan sa kinabuhi ang usa ka 23 anyos nga lalaki human kini nga gipusil alas 2:10 ang takna niadtong milabay’ng kaadlawon sa Purok Talisay, Luna Extension, Brgy. Zone 3 dakbayan sa Digos partikular na sa Walwal Music Bar.
Ang biktima giilang si Rodolfo Mabitad Suizo, 23 anyos, ulitawo, walay trabaho ug residente sa Purok Cabbage, Lapu-Lapu Extension, Brgy. Zone 3, Digos City.
Subay sa imbestigasyon sa kapulisan, nasayran nga samtang nag-inom og ilimnong makahubog sa nahisgutang bar ang biktima kauban ang iyang mga higala, kalit lamang matud pa nga gipusil sa wala mailhing supek ang biktima gamit ang wala masutang armas og naigo kini sa tuo nga bahin sa iyang aping.
Narekober sa crime scene ang usa ka relo, kwarta ug cellphone. Dali pa nga gidagan sa Davao Sur Provincial Hospital ang biktima apan gideklara na kining patay sa doktor.
Patay’ng lawas sa biktima ang gipahiluna na karon sa usa ka lokal nga punerarya sa nahisgutang lugar.
Mipahigayon na usab ang Digos Police og hot pursuit operation alang sa posibleng pag-ila ug pagsikop sa mga mipaluyo sa maong insidente.
