DAVAO CITY – Subling gipasalig ni Davao City Mayor Inday Sara Duterte-Carpio ngadto sa mga jeepney drivers ug operators ang paglakip sa social compensation packages sa transport sector sa higayon magsugod na ang pagpatuman sa High Priority Bus System (HPBS).
Sumala sa Mayor nga ang lokal nga panggamhanan nangayo na og pakitabang sa kongreso pinaagi kang kanhi House speaker Gloria Macapagal Arroyo nga ilakip ang social packages alang sa mga drivers ug operators nga maapektohan sa pagpatuman sa HPBS. Kalakip sumala pa niini ang educational benefit alang sa usa ka dependent nga mao ang scholarship program nga four-year college course.
Gitataw sab sa Mayor nga sa Marso 2020 kinahanglan nga malista na ang mga benepisiyaryo sa mga drivers ug operators aron nga mahilakip kini sa master list sa siyudad.
Gilangkuban kini sa cash assistance and Technical Vocational training pinaagi sa Technical Education and Skills Development Authority (TESDA).
Kahinumduman nga ilalom sa HPBS, magpakatag ang siyudad ug 1,000 “Life Bus” units nga ihulip sa 7,000 public utility jeepneys sa 29 ka mga rota sa dakbayan.
Gikanayong ang pangalan nga “Life Bus” maggikan sa brand sa siyudad nga “Life is Here”.
Plano sa dakbayan nga sugdan pagpatuman sa HPBS unang quarter ning kasamtangan nga tuig.
