DAVAO CITY – Gipasabot sa Davao City Anti-Drug Abuse Council (CADAC) ang kamahinungdanon sa pagpailalom sa mga kompanya og random drug test kini aron masayran kung wala nagbinuang ang mga empleyado ug wala nalambigit sa illegal nga aktibidad.
Kahinumduman nga una ng gibutyag sa ahensiya nga anaa sa 900 ka mga balay pamatigayon sa siyudad ang wala nagpailalom og training alang sa drug-free workplaces.
Gipasabot sa CADAC nga ang drug-free workplace seminar magsilbi na nga usa sa mga rekisitos aron nga maka-renew ang usa ka kompanya sa ilang business permit alang sa 2020.
Ilalom sa Labor Department Order Number 53-03 o mas nailang Guidelines of the Implementation of Drug-Free Workplace policies and programs, mandato sa mga kompanya sa pribadong sektor nga mosumite sa ilang drug-free workplace policy ingon man three-year drug-free workplace plan isip basehan sa ilang himuon nga monitoring.
Una ng gibutyag ni Ronaldo Rivera, program director sa Tabangan Atong Reformist Aron Naa’y Asenso (Tara Na!) sa CADAC, nga bugtong 1,872 lamang ka mga kompanya ang mi-comply sa ordinansa gikan sa 2,798 service-oriented firms nga anaa sa listahan sa Business Bureau.
