DAVAO CITY – Mapalasamaton ang Davao City Police Office (DCPO) gumikan kay wala silay natalang mga dagko nga insidente ug nahimong malinawon sa kinatibuk-an ang pagsaulog sa kapaskohan dinhi sa dakbayan.
Gani wala sab sumala pa silay nadakpan nga nakalapas sa fire cracker ban.
Tungod niini nagpadangat sa ilang pagpasalamat si Police Col. Kirby John Kraft, director sa DCPO sa gihatag nga kooperasyon sa publiko.
Sumala sa opisyal nga ang kapulisan sa siyudad wala nagsaulog og kapaskohan kauban ang ilang mga pamilya kini aron lamang masiguro ang kaluwasan sa publiko ilabi na kadtong mga mitambong sa misa.
Samtang gikanayon sab ni Angel Sumagaysay, head sa Public Safety and Security Command Center (PSSCC), nga wala sab silay nahipus nga mga impormasyon nga adunay mga insidente nga nahitabo sa mga simbahan sa siyudad atol sa kapaskohan kini tungod bastante ang ihap sa mga otoridad nga gipakatag aron nga motutok sa sitwasyon sa mga simbahan sa Distrito 1,2 ug 3.
Gikanayon sab ni Task Force Davao (TFD) commander Consolito Yecla, nga human ang misa sa mga simbahan, gipauna nila ug uli ang mga tawo ayha nag-pull out ang ilang mga tropa kini aron masiguro nga wala dautan nga mga tawo nga makapahimulos.
